Госць падрабязна азнаёміўся з ВНУ, работай факультэтаў і кафедраў. Пагутарыў з выкладчыцкім калектывам і студэнтамі.

У ходзе экскурсіі па найбуйнейшым транспартным ВНУ краіны Юрыю Горлаву расказалі аб слаўнай гісторыі БелДУТа, са сцен якога выйшла не адно пакаленне вядомых спецыялістаў, вучоных, кіраўнікоў усіх узроўняў. Памочнік Прэзідэнта азнаёміўся з работай факультэтаў і кафедраў, зазірнуў у навучальныя лабараторыі. На ваенна-транспартным факультэце яму давялося ўзяць у рукі аўтамат і прайсці выпрабаванне на трапнасць.

Наведалі таксама размешчаныя ў ВНУ ўчасткі раённай выбарчай камісіі. 

Завяршэннем візіту стала грунтоўная гутарка са студэнтамі, прафесарска-выкладчыцкім саставам у вялікай лекцыйнай аўдыторыі. Як адзначыў Юрый Мікалаевіч, свет зараз хутка мяняецца, але ва ўсе часы моладзь вучылася, працавала з апорай на вопыт старэйшых пакаленняў. Яны дапаўнялі адзін аднаго, а агульны вынік станавіўся прыкладам і падсілкоўваў наступныя пакаленні. 

У час гутаркі закранулі тэмы развіцця нашай краіны ва ўсіх сферах: эканамічнай, транспартнай, энергетычнай, культурнай. Беларусь рухаецца наперад, доказам гэтага служыць рэалізацыя знакавых праектаў, увод новых прамысловых, сацыяльных аб'ектаў. Гэта, па словах памочніка Прэзідэнта, падабаецца далёка не ўсім. Тут важна не паддавацца знешняму ўплыву, асабліва тым, хто нарадзіўся пазней развалу СССР, нестабільнасці 1990-х, не бачыў, якім было жыццё беларусаў на світанку нашага суверэнітэту. У першую чаргу праз моладзь з яе менш крытычным мысленнем заходнія паліттэхнолагі спрабуюць разгайдаць, дэстабілізаваць наша грамадства, усю краіну. У гэты няпросты час як ніколі важна згуртаванасць нацыі, адзінства пакаленняў. І кожны, падкрэсліў Юрый Горлаў, павінен унесці свой пасільны ўклад у развіццё нашай Радзімы, любімай Беларусі. Словам і справай, аддачай у вучобе, працы, правільным выбарам.