Акцыя "Дай лесу новае жыццё!" пройдзе ў Беларусі 11-31 кастрычніка

У Беларусі з 11 па 31 кастрычніка пройдзе акцыя "Дай лесу новае жыццё!" Аб гэтым БЕЛТА паведамілі ў прэс-службе Міністэрства лясной гаспадаркі. 

Кампанія па аднаўленні беларускіх лясоў ахопіць усе рэгіёны краіны. Асаблівая ўвага будзе ўдзелена ветравальна-бураломным участкам. Акцыя будзе прысвечана Году добраўпарадкавання. 

"Сімвалічна, што роўна год таму, 11 кастрычніка, першы этап акцыі "Дай лесу новае жыццё!" адкрыў асабіста кіраўнік дзяржавы Аляксандр Лукашэнка. Кампанія пад такой назвай праводзілася ўжо двойчы. За гэты час у ёй прынялі ўдзел дзясяткі тысяч валанцёраў", - адзначылі ў Мінлясгасе.