Старшыня аблвыканкама Іван Крупко з намеснікамі, памочнік Прэзідэнта – інспектар па Гомельскай вобласці Руслан Пархамовіч працавалі на мемарыяльным комплексе «Баграціён» у Светлагорскім раёне.

На аб'екце працавалі і дэпутаты Палаты прадстаўнікоў на чале са старшынёй Ігарам Сяргеенкам. Разам яны рыхтавалі падставу пад кладку тратуарнай пліткі: разраўноўвалі і трамбавалі глебу.

Да працы далучыўся працоўны дэсант з ліку актывістаў БРСМ, саюза жанчын, прафсаюзаў, Чырвонага Крыжа, МНС, вайскоўцы. Яны рыхтуюць памяшканні да наступнай музеефікацыі: чысцяць плітку, праводзяць вільготную ўборку памяшканняў.

Рэканструкцыя мемарыяльнага комплексу «Баграціён» стартавала ў сакавіку 2025 года. Тут ужо з'явіўся новы будынак інфармацыйнага цэнтра, дзе размесціцца пастаянная і часовая экспазіцыі, навучальны клас. Пяць выставачных залаў раскажуць пра этапы падрыхтоўкі і рэалізацыі легендарнай аперацыі. На дадзены момант работнікі культуры прыступаюць да музеефікацыі.

Акрамя таго, ужо гатовая пляцоўка для ўстаноўкі стэлы і ваеннай тэхнікі пад адкрытым небам. Зараз праводзіцца работа над элементамі добраўпарадкавання.

У рамках суботніка будаўнікі расказалі, што дзеючы бліндаж пераабсталююць у інтэрактыўны цір, на пад'ездзе да мемарыяла павялічаць колькасць парковачных месцаў, у тым ліку для турыстычных аўтобусаў, усталююць відэаназіранне, дададуць архітэктурнае падсвятленне і сістэму фонавага гуку.

Па словах Івана Крупко, адкрыць комплекс пасля рэканструкцыі плануюць у чэрвені 2026 года.

Ігар Сяргеенка расказаў, што дэпутаты прынялі запрашэнне ад калег з Гомельскай вобласці з баявым настроем:

– Дэпутацыяй ад Гомельскай вобласці была ўнесена прапанова выехаць і прыняць удзел у абласным суботніку. Мы адгукнуліся, сёння прыехаў вялікі калектыў. Проста выдатна, што праводзіцца такая праца па ўвекавечанні памяці нашых продкаў.

Ігар Сяргеенка адзначыў, што на заклік адгукнулася шмат моладзі, што вельмі важна:

– Тут працуюць людзі, якім неабыякавы лёс краіны. Гэта выдатная справа, а абноўлены музей будзе месцам прыцягнення не толькі жыхароў Гомельскай вобласці, але і гасцей, турыстаў.

Рашэнне аб рэканструкцыі мемарыяльнага комплексу «Баграціён» у Светлагорскім раёне было прынята летась. За гэты час зроблена праектна-каштарысная дакументацыя, пройдзена экспертыза, пачаты работы. Пра гэта журналістам расказаў Іван Крупко:

– Мы дакладна вызначылі, што павінна быць на аб'екце, і ў сакавіку правялі першы абласны суботнік, на якім сабралі каля пяці мільёнаў рублёў. Існуючая экспазіцыя была фактычна створана сваімі рукамі, умовы для захоўвання экспанатаў з часам пагаршаліся, музей трэба было развіваць. Тым больш колькасць турыстаў павялічваецца з кожным годам.

Губернатар падзякаваў усім, хто далучыўся да рэгіянальнага суботніка, які быў абвешчаны сёння:

– Удзячныя ўсім, хто прымае ўдзел у працы па добраўпарадкаванні гэтага аб'екта. Прыемна, што праект успрымаецца як агульны для ўсёй краіны. Аперацыя «Баграціён» важная для кожнага жыхара Беларусі, яна паслужыла стартам для вызвалення нашай Радзімы ад працяглай акупацыі. Памятаючы пра трагізм і гераізм вайны, мы будзем рабіць усё для таго, каб захаваць мір у нашай рэспубліцы і паказаць, што мы міралюбная краіна.

Кіраўнік рэгіёна адзначыў, што жыхары вобласці, якія не змаглі даехаць да «Баграціёна», працавалі ў сваіх аграгарадках і раённых цэнтрах.

– Мы разумеем, што ў Год добраўпарадкавання важна рабіць усё магчымае для сваёй малой радзімы і ўсёй краіны.

Удзел у суботніку прынялі каля 300 тысяч чалавек, плануецца сабраць каля пяці мільёнаў рублёў.