У адпаведнасці з заключанымі ў красавіку Жэнеўскімі пагадненнямі 15 мая 1988 года пачаўся вывад савецкіх войскаў з Афганістана. У гонар гэтай даты на тэрыторыі ваенна-гістарычнага комплексу "Партызанская крыніца" старшыня аблвыканкама Іван Крупко сустрэўся з воінамі-інтэрнацыяналістамі.

– Нашы землякі праходзілі службу ў дэсантных, танкавых, інжынерных, пагранічных і многіх іншых войсках. Аказвалі ваенную і грамадзянскую дапамогу ў розных пунктах гэтай краіны, практычна ва ўсіх яе правінцыях. У Афганістане дагэтуль добрым словам успамінаюць шураві. Праз Афганскую вайну прайшло звыш пяці тысяч міратворцаў Гомельшчыны, 1200 з іх узнагароджаны ордэнамі і медалямі, 126 не вярнуліся з поля бою, – адзначыў губернатар.

Удзельнікі сустрэчы ўсклалі кветкі да мемарыяла і ўшанавалі памяць загінуўшых хвілінай маўчання.

Ветэранам інтэрнацыянальнай вайны кіраўнік рэгіёна ўручыў юбілейныя медалі, якія выпусцілі спецыяльна да 35-годдзя вываду войскаў з Афганістана.

– Беларускія хлопцы годна служылі, абараняючы ад тэрарыстаў нацыянальныя інтарэсы і забяспечваючы бяспеку паўднёвых межаў савецкай краіны, паказалі сябе сапраўднымі пераемнікамі ратнай славы бацькоў і дзядоў, якія перамаглі фашызм. Час няўмольна рухаецца наперад. Але, як бы ні мянялася жыццё, тая вайна будзе жыць у памяці людской гэтак жа доўга, як і Вялікая Айчынная. Бо яе франтавы дзённік напісаны мужнасцю і доблесцю салдат, іх слаўнымі подзвігамі і ўспамінамі, – падкрэсліў Іван Крупко.

Сустрэча завяршылася рэканструкцыяй бою і дыялогавай пляцоўкай, на якой абмеркавалі хвалюючыя ветэранаў пытанні.