Старшыня аблвыканкама Іван Крупко ўказаў на неабходнасць фарміравання ў кожным раёне комплексу задач па добраўпарадкаванні. Акцэнт варта зрабіць і на забеспячэнні насельніцтва чыстай вадой.

Бяспека заўсёды ў прыярытэце 

На Гомельшчыне абследавана каля 100 аб'ектаў з масавым знаходжаннем грамадзян, з іх 44 – гандлёвыя цэнтры. У цэлым, дакладваюць службы МНС, базавыя патрабаванні бяспекі на ўсіх аб'ектах выконваюцца. Разам з тым, на месцах выяўлены недапрацоўкі і недахопы, часцей за ўсё гэта загружванне шляхоў эвакуацыі, несанкцыянаваныя перапланіроўкі памяшканняў, няспраўнасці сістэм пажарнай сігналізацыі і пажаратушэння. Сустракаюцца і парушэнні будаўнічых нормаў.

Па словах старшыні аблвыканкама, гандлёвыя і любыя іншыя аб'екты з масавым знаходжаннем грамадзян без станоўчага заключэння спецыялістаў МНС уводзіцца ў эксплуатацыю не павінны, няхай гэта будзе пабудаваны з нуля будынак або рэканструяваны, або пасля змены ўласніка. Няма ўзгаднення – ніякага адкрыцця, ніякай работы. Калі ж на дзеючым аб'екце ліквідацыя парушэнняў зацягваецца, тэрміны не вытрымліваюцца, яго неабходна зачыняць і кропка. І няважна, інтэрнат гэта ці сацыяльная ўстанова. Бяспека людзей вышэй за ўсё, падкрэсліў губернатар.

Буракі раскуплялі актыўна, бульбу – не вельмі

Праведзены аналіз расходавання запасаў, якія захоўваюцца ў стабфондах рэгіёна. Спецыялісты супакойваюць: забеспячэнне жыхароў вобласці плодаагародніннай прадукцыяй знаходзіцца на належным узроўні, харчовай бяспекі нічога не пагражае. З апярэджаннем графіка расходаваліся толькі буракі, аднак запасы гэтай гародніны ў вытворцаў дастатковыя, дэфіцыту не прадбачыцца. Па астатніх пазіцыях, наадварот, праглядаецца адставанне ад графіка рэалізацыі. Гэта значыць, пакупніцкі попыт, да прыкладу, на бульбу, іншую гародніну і садавіну значна ніжэй, чым пралічвалася.

Пры гэтым моцных ваганняў цэн, як было падкрэслена, на плодаагароднінную прадукцыю не прагназуецца.