ЗАТ «Сатурн-1» – адно з прадпрыемстваў, якое уключана ў новую праграму развіцця Прыпяцкага Палесся.

Прадпрыемства выконвае поўны цыкл апрацоўкі і вырабу складаных металаканструкцый і металавырабаў. Тут выпускаюць люкі да паўвагонаў і іншыя вырабы чыгуначнага прызначэння, прадукцыю для горнаруднай, нафтаздабыўной, будаўнічай галіны, камплектуючыя для сельскагаспадарчай тэхнікі. 

Кіраўніку дзяржавы расказалі, што «Сатурн-1» — адно з горадаўтваральных прадпрыемстваў. Тут заняты больш за 170 чалавек. Асаблівую ўвагу надаюць сацыяльнай падтрымцы работнікаў.

Сёння гэта адно з чатырох прадпрыемстваў на прасторах СНД, якое выпускае люкі да паўвагонаў. Яно актыўна працуе як на расійскім, так і на беларускім рынках. Упор робяць у тым ліку на рабоце з сярэднімі і дробнымі заказчыкамі, што дазваляе нарошчваць прыбытак і ўмацоўваць прамысловыя магутнасці.

У апошнія гады акцыянернае таварыства пашырае вытворчыя плошчы і актыўна нарошчвае аб'ёмы вытворчасці, павялічвае працоўныя месцы і заработную плату. Прадпрыемства ўдзельнічае ў праграме развіцця Прыпяцкага Палесся. За кошт уласных сродкаў пераабсталявалі выкупленыя ў Жыткавіцкага філіяла Гомельскага абласнога спажывецкага таварыства памяшканні пад новы зварачны цэх, які заняў дзве тысячы метраў квадратных. 

Станоўчае заключэнне экспертызы па ПСД атрымана ў маі 2025 года, цяпер вядуцца будаўнічыя работы. За кошт рэалізацыі інвестпраекта можна будзе нарасціць аб'ёмы вытворчасці прадукцыі ў 2,4 разы да ўзроўню 2022 года, удасканаліць методыкі апрацоўкі металу.

Прэзідэнт Беларусі ацаніў абсталяванне ў цэхах і даручыў кіраўніку прадпрыемства па магчымасці падтрымліваць сельскагаспадарчую галіну: чалавечымі рэсурсамі падчас уборачнай і рамонтам тэхнікі.

Аляксандр Лукашэнка падчас наведвання «Сатурна-1» пазначыў умовы прадастаўлення падтрымкі прадпрыемствам:

– Калі гэта выгадна для краіны, мы дапаможам.

Кіраўнік дзяржавы звярнуў увагу, што лішніх грошай няма і ніхто проста так фінансаванне не прадаставіць. Але ў краіне ёсць фінансавыя рэсурсы для ўкладання ў выгадныя праекты, якія прынясуць прыбытак.