Старшыня аблвыканкама Іван Крупко таксама акцэнтаваў увагу на ўводзе ў рэгіёне станцый абезжалезвання, рэканструкцыі комплексу воінскай славы.

Рыжэць вада не будзе – кропка

На рэалізацыю падпраграмы «Чыстая вада» на Гомельшчыне з бюджэту выдзелены вялікія сродкі. У гэтым годзе трэба будзе пабудаваць 28 станцый абезжалезвання. Вядзецца падрыхтоўка праектна-каштарыснай дакументацыі, дзесьці ўжо пачаліся будаўніча-мантажныя работы. Акрамя станцый, плануецца таксама ўзвядзенне воданапорных вежаў, бурэнне артэзіянскіх свідравін, падвядзенне адпаведных камунікацый. На нейкіх дзеючых станцыях абезжалезвання патрабуецца дапрацоўка і адладка, каб аб'екты выйшлі на неабходныя параметры работы.

Па словах старшыні аблвыканкама, важна дакладна прапрацаваць усе фінансавыя моманты, раскласці на каляндарны год. Неабходна выканаць усе запланаваныя мерапрыемствы ў тэрмін і забяспечыць нашых грамадзян пітной вадой добрай якасці.

Абнавіць, ня сказіўшы сутнасць

Абмеркавалі арганізацыю і парадак работ па абнаўленні комплексу воінскай славы «Баграціён» у Светлагорскім раёне. Праектныя работы практычна завершаны, будаўнікі прыступілі непасрэдна да рэканструкцыі. Перад імі пастаўлена задача захаваць музейную экспазіцыю ў першапачатковым выглядзе, толькі абнавіць асобныя элементы, а таксама дапоўніць комплекс новымі аб'ектамі і памяшканнямі. Прадуманы ўсе нюансы: ад асвятлення пляцовак да размяшчэння транспарту на пад'ездах да комплексу. Усе намаганні накіраваны на павышэнне турыстычнай прывабнасці, але без шкоды для гістарычнай дакладнасці, высокага патрыятычнага складальніка ўсёй экспазіцыі.

Губернатар пазначыў тэрмін: комплекс павінен быць здадзены да канца чэрвеня – да гадавіны пачатку знакавай у гісторыі краіны ваеннай аперацыі «Баграціён».

Забудзьцеся пра тэхналогіі мінулага стагоддзя

Увагу завастрылі таксама на арганізацыі работы на жывёлагадоўчых аб'ектах. Разабралі пытанні падачы кармоў жывёле, утрымання і вырошчвання цялятаў, адладкі сістэм гнаявыдалення. "Мінулага стагоддзя", падкрэслілі на нарадзе, у гэтых вытворчых працэсах быць не павінна. Ва ўсіх раёнах хапае рэсурсаў і кадраў, каб забяспечыць прымяненне сучасных падыходаў і тэхналогій.

Акрамя таго, на самым вышэйшым узроўні даручана прыняць выключныя меры для падрыхтоўкі ў тэрмін тэхнікі да пасяўной. Рыхтаваць у першую чаргу неабходна трактары і пасяўныя агрэгаты. Гэта тычыцца не толькі рамонтаў, але і праходжання планавых тэхаглядаў. На 24 лютага, да прыкладу, толькі 40% трактароў у рэгіёне прайшлі ТО. У ліку аўтсайдэраў па тэмпах рамонтных работ і афармленні адпаведных дакументаў Кармянскі і Акцябрскі раёны.