На пасяджэнні аблвыканкама падвялі вынікі сацыяльна-эканамічнага развіцця Гомельшчыны
Увагу акцэнтавалі на неабходнасці выхаду ўсіх галін на прагнозныя паказчыкі да канца верасня. Вёў пасяджэнне кіраўнік рэгіёна Іван Крупко.
Пяць з васьмі
Навальнічны фронт у сярэдзіне ліпеня нарабіў спраў павобласці, але, як адзначыў губернатар, па шэрагу напрамкаў эканамічныя страты ўжо папоўнены. Пастаўленыя кіраўніцтвам краіны і рэгіёна задачы не здымаюцца, усім галінам неабходна выйсці на прагнозныя паказчыкі па выніках ІІІ квартала.
З васьмі ключавых параметраў сацыяльна-эканамічнага развіцця Гомельшчыны ў першым паўгоддзі выканана пяць. Гэта інвестыцыі ў асноўны капітал (тэмп росту 106,9% пры заданні 103,6%), сукупныя паступленні даходаў кансалідаванага бюджэту, вытворчасць імпартазамяшчальных тавараў, рост сярэдняй зарплаты (больш за 119%) і агульны ўвод жылля. Будаўнікі пры прагнозе 192,5 тысячы квадратных метраў жылля ў студзені – чэрвені ўвялі 217,5 тысячы.
Неабходна дадаць і выканаць даведзеныя заданні па зніжэнні ўзроўню затрат, уводу жылля з дзяржаўнай падтрымкай і па галоўным параметры – валавым рэгіянальным прадукце. Тэмп росту ВРП склаў 102,1%, прагноз на паўгоддзе быў 102,8%.
Загружаем прадпрыемствы
У разрэзе асноўных галін адзначылі дастаткова паспяховую работу ў сельскай гаспадарцы, гандлі, на транспарце. З плюсам спрацавалі прамысловасць, будаўніцтва, інфармацыя і сувязь. Прыкметна прыбаўка ў мясамалпраме, а вось камбінатам хлебапрадуктаў трэба падцягвацца.
Станоўчая дынаміка ў прамысловасці дасягнута. Аднак не на ўсіх прадпрыемствах. "Гомсельмаш" і ў цэлым сектар машынабудавання спрацавалі ніжэй за ўзровень студзеня – чэрвеня 2023-га. Спасылаюцца ў асноўным на дэфіцыт абаротных сродкаў, праблемы з камплектуючымі.
Большай аддачы чакаюць ад БМЗ, "Гомельшкла". Ёсць цяжкасці на сучасным этапе ў "Гомельэнерга". Сур'ёзныя рашэнні ў бліжэйшы час трэба будзе прымаць па жлобінскай фабрыцы "БЕЛФА", якая доўгі час не выходзіць на ўстойлівае развіццё.
У будаўнічым комплексе, нягледзячы на выкананне задання па ўводзе жылля, неабходна павышаць аб'ёмы будаўніча-мантажных работ, загружаць прадпрыемствы. Рэзервы для росту ёсць у многіх раёнах і абласным цэнтры.
Новыя працоўныя месцы, новае жыццё для аб'ектаў
Дэталёва абмеркавалі выкананне даручэння кіраўніка дзяржавы ў рамках канцэпцыі "Адзін раён – адзін праект". У стадыі рэалізацыі зараз 25 такіх праектаў, 18 з іх ідуць з апярэджаннем графіка. Па двух, Чачэрскім і Мазырскім, раёнах ёсць невялікае адставанне.
Добрыя, слушныя ідэі для раёнаў, асабліва невялікіх, па-ранейшаму ў цане. Ад інвестараў чакаюць па-сапраўднаму арыгінальных задум. Сучасныя жывёлагадоўчыя комплексы, як было падкрэслена, для канцэпцыі не падыходзяць: іх у любым выпадку будуць будаваць. Патрэбны па-сапраўднаму інавацыйныя праекты.
У вобласці актыўна зносяць і ўцягваюць у абарот дзяржмаёмасць, якая не выкарыстоўваецца. 264 аб'екты за паўгоддзе рэалізавалі або знеслі, да продажу прапанавана 210. Гадавы план выкананы на 41%. У ліпені ўдалося прадаць знакавы для вобласці аб'ект – былы завод вымяральных прыбораў у цэнтры Гомеля. Чакаецца, што ўласнік увядзе яго ў абарачэнне ў максімальна сціснутыя тэрміны. Пастаўлена дакладная задача знесці 24 аб'екты ў розных раёнах да 1 кастрычніка. Кантроль яе выканання будзе цвёрдым і прынцыповым.
Стратэгія – перш за ўсё
У сельскай гаспадарцы спрацавалі з плюсам, але нараканняў да галіны хапае. Як заўсёды, карціна па раёнах неаднастайная. Дзесьці не могуць падняць надоі, іншыя недабіраюць у раслінаводстве.
Увагу акцэнтавалі на жывёлагадоўчай галіне. Для нас у цэлым характэрны недапрацоўкі ва ўзнаўленні пагалоўя. Стаіць задача прадоўжыць удасканаленне методык вырошчвання маладняку, узнімаць працоўную і тэхналагічную дысцыпліну ў гаспадарках.
Галіна па-ранейшаму скардзіцца на кадравы голад. Хаця станоўчая дынаміка намецілася: колькасць маладых спецыялістаў, якія займаюць вакансіі ў АПК, год ад году павялічваецца.
Як адзначыў Іван Крупко, сёння ў краіне многія сельгаспрадпрыемствы выходзяць на высокі ўзровень развіцця ў плане ўмоў працы, абсталявання, зарплат работнікаў і гэтак далей. Як прыклад, "Палессе-Аграінвест" у Петрыкаўскім раёне.
Мы ставім пытанне, падкрэсліў губернатар, пераходу на такі ўзровень або блізкі да яго ўсіх прадпрыемстваў і фермаў Гомельшчыны. Такая маштабная мадэрнізацыя – справа часу. "Падыходы выпрацаваны, яны ёсць на паперы, будзем да гэтага рухацца", – сказаў старшыня аблвыканкама.
У першую чаргу патрэбна вывераная стратэгія развіцця. Першачарговай задачай адказных кіраўнікоў павінен стаць не збор статыстыкі, а непасрэдна выпрацоўка такой стратэгіі ў кожным раёне, па кожным прадпрыемстве.
Удзел у пасяджэнні прынялі памочнік Прэзідэнта – інспектар па Гомельскай вобласці Юрый Горлаў, старшыня абласнога Савета дэпутатаў Кацярына Зянкевіч.
