Увагу акцэнтавалі на выкананні ўстаноўленых тэрмінаў здачы пашпартоў гатоўнасці крыніц і спажыўцоў цеплавой энергіі. Вёў пасяджэнне старшыня аблвыканкама Іван Крупко.

Да жніўня шмат работы

Тэрміны падрыхтоўкі ўсіх аб'ектаў вобласці да ацяпляльнага перыяду вызначаны досыць выразна. Да 2 жніўня павінна быць здадзена не менш за 50% пашпартоў гатоўнасці цеплакрыніц і не менш за 80% – спажыўцоў цеплавой энергіі. Здачу ўсіх пашпартоў у рэгіёне абавязаны зафіксаваць да 31 жніўня. Губернатар даручыў рэалізаваць усе запланаваныя арганізацыйна-тэхнічныя мерапрыемствы і з запасам па часе, гэта значыць да наступлення халадоў забяспечыць устойлівае паліва- і энергазабеспячэнне сацыяльна-эканамічнага комплексу і насельніцтва Гомельшчыны. Даручана таксама распрацаваць і ўзгадніць варыянты рэжымаў энергазабеспячэння спажыўцоў з улікам магчымага зніжэння паставак энерганосьбітаў, да 14 чэрвеня – правесці ацэнку надзейнасці ўсёй сістэмы электразабеспячэння. 

Акрэслена кола задач для профільных арганізацый: "Гомельэнерга","Гомельаблгаз", прадпрыемстваў сістэмы ЖКГ і іншых. Даведзены аб'ёмы замены цепласетак: больш за 72 кіламетры. Пакуль план выкананы на 18,8%. Па словах Івана Крупко, з заменай труб лепш управіцца ў летні перыяд, не зацяг-ваць да дажджоў і халадоў. Лепш цяпер актыўна працаваць ўвесь светлавы дзень, чым капаць у восеньскую слату і гразь.

Патрабуецца нарыхтаваць 320 тысяч кубаметраў паліва, гэты план на канец мая зачынены ўжо на 69%. Запас дроў у вобласці забяспечаны ў поўнай меры. Але ў шэрагу месцаў трэба правесці рэканструкцыю навесаў. Каб пазбегнуць скаргаў ад насельніцтва нарыхтоўку і рэалізацыю дроў у раёнах неабходна праводзіць не ў канцы лета, а значна раней, каб паліва паспела прасохнуць.

Першы снег пакажа 

Большай сістэмнасці старшыня аблвыканкама запатрабаваў ад АПК у падрыхтоўцы жывёлагадоўчых аб'ектаў да зімоўкі. Тут зноў жа катэгарычна нельга цягнуць да верасня, паклапаціцца не толькі аб зберажэнні цяпла, але і аб усіх сістэмах функцыянавання ферм: водапаення, кармлення, навозаўдалення, вентыляцыі.

У цэлым, было падкрэслена, у вобласці ёсць усе рэсурсы для сустрэчы зімы ў поўным узбраенні. На месцах трэба толькі пісьменна арганізаваць гэтую работу на кожным этапе, ўкласціся ва ўсе ўстаноўленыя тэрміны. Ацэнку кампетэнтнасці кіраўнікоў дасць ужо восень.

У мінулым годзе, адзначыў губернатар, сістэма энергазабеспячэння вобласці ў цэлым адпрацавала стабільна, без сур'ёзных эксцэсаў. Аднак у шэрагу раёнаў і Гомелі так і не здалі своечасова пашпарты гатоўнасці асобных аб'ектаў. Гэта, падкрэсліў кіраўнік вобласці, не павінна паўтарыцца. Агучана патрабаванне самым аператыўным чынам адрэагаваць на першыя снегапады, каб не дапусціць леташнія недахопы ў расчыстцы вуліц і тратуараў. Калі ў пікавыя выпадзенні ападкаў снегаўборачных машын (закуплены ў дастатковай колькасці) будзе ўсё ж не хапаць, варта аператыўна арганізаваць дапамогу з боку прадпрыемстваў, арганізацый – яны павінны вылучыць людзей і тэхніку.

Удзел у пасяджэнні прынялі памочнік Прэзідэнта – інспектар па Гомельскай вобласці Юрый Горлаў, старшыня абласнога Савета дэпутатаў Кацярына Зянкевіч.