Намецілі задачы ў сферы парадку і добраўпарадкавання на бягучы год. Пасяджэнне вёў старшыня аблвыканкама Іван Крупко.

Вясна пакажа плён працы

Як адзначыў губернатар, на Гомельшчыне ў 2024 годзе былі выкананы ўсе 90 даведзеных рэспубліканскім планам задач па навядзенні парадку на зямлі, прычым 38 з іх – больш чым на 150% да планавага аб'ёму. Аднак 2025-ы, аб'яўлены Годам добраўпарадкавання, запатрабуе ад усіх службаў, арганізацый, прадпрыемстваў і грамадзян нашай краіны яшчэ большых намаганняў. Як адзначыў Іван Крупко, зямля, на якой працуюць сапраўдныя гаспадары, заўсёды будзе прыгожай і квітнеючай. І ўжо гэтай вясной, па словах губернатара, жыхары рэгіёна і нашы госці павінны ўбачыць плён сур'ёзнай праведзенай работы па навядзенні парадку. Разам з тым задач па ператварэнні нашага краю, яго абнаўленні, азеляненні ў гарадах і сёлах, у кожным кутку застаецца нямала. Гэта задачы ў тым ліку ў сферах землеўпарадкавання, абыходжання з адходамі, добраўпарадкавання прамзон, зносу старога жылля і невыкарыстоўваемых будынкаў, а таксама ўдасканалення вулічна-дарожнай сеткі.

Летась, дарэчы, у вобласці знесена амаль 700 старых дамоў (155% да задання). Вельмі актыўна праводзіліся работы па азеляненні, за год высаджана звыш 85 тысяч дрэў і 48 тысяч кустоў. Лічбы нашмат вышэй за даведзеныя заданні. Але зніжаць тэмпы азелянення ў 2025-м нідзе не будуць, хутчэй наадварот. Хоць адстаючыя ў вобласці таксама выяўлены, нарасціць аб'ёмы пасадак даручана ў Хойніках і Васілевічах Рэчыцкага раёна.

Задачы па абыходжанні з адходамі ў вобласці выкананы не ў поўнай меры толькі на тэрыторыях садаводчых таварыстваў. У гэтым кірунку вырашана ўзмацніць работу і зрабіць больш жорсткім кантроль за выкананнем.

Старшыня аблвыканкама даручыў у цэлым прапрацаваць і ўдасканаліць падыходы ў абыходжанні з адходамі з улікам укаранення кантэйнернай сістэмы збору, з'яўлення новых аб'ектаў перапрацоўкі, адкрыцця новага палігона ЦКА. Важна ахапіць сучаснымі, рацыянальнымі і эфектыўнымі метадамі збору адходаў як мага большую колькасць населеных пунктаў, забяспечыць выманне са смецця большага аб'ёму другаснай сыравіны.

Даводзьце аб'ёмы і патрабуйце выканання 

Асобна закранулі праблемы вырастання ў рэгіёне баршчэўніка Сасноўскага і сумніка канадскага. Плошчы інвазіваў павялічыліся ў Кармянскім, Рагачоўскім, Буда-Кашалёўскім, Лоеўскім раёнах. Трывогу выклікае разрастанне сумніка на ўскраінах Гомеля. 

Як было адзначана, знішчэннем шкоднасных раслін на месцах трэба займацца разам, не перакідаючы задачу ад адной службы да другой. І памятаць пра тэрміны цвіцення, не даводзіць да пападання насення ў глебу пры скошванні. Барацьбу з інвазівамі вырашана паўсюдна ўзмацніць, пры гэтым сумяшчаць хімічны і механічны спосабы. 

Разабралі і пытанне рэкультывацыі ў вобласці так званых ўнутрыгаспадарчых кар'ераў. Іх у нас больш за 160. Асобныя патрабуюць неадкладных мер па добраўпарадкаванні і навядзенні парадку. У Лоеўскім і Чачэрскім – па адным такім кар'еры, у Буда-Кашалёўскім і Добрушскім – па два. Акрамя таго, намечаны планы па раскарчоўцы сельскагаспадарчых зямель, зарослых хмызняком. Гэтую працу трэба асабліва паскорыць у Светлагорскім раёне. 

Кіраўнік вобласці запатрабаваў завастрыць увагу на ўцягванні зямель у сельскагаспадарчы абарот. Гэта тычыцца высечкі, раскарчоўкі зарасніку, меліярацыі. «Працы на зямлі – мора. Тут не павінна быць ніякага фармалізму. Даводзьце раёнам канкрэтныя задачы і патрабуйце выканання да гектара», – рэзюмаваў губернатар. 

Удзел у рабоце пасяджэння прынялі кіраўнік спраў Прэзідэнта – упаўнаважаны кіраўніка дзяржавы ў Гомельскай вобласці Юрый Назараў, памочнік Прэзідэнта – інспектар па Гомельскай вобласці Юрый Горлаў.