Увагу таксама акцэнтавалі на гатоўнасці сельгастэхнікі да пасяўной. Старшыня аблвыканкама Іван Крупко запатрабаваў паскорыць рамонтныя работы.

Усё павінна блішчаць

Да Дня Перамогі застаўся 81 дзень. У рэгіёне праводзіцца планамерная падрыхтоўчая работа, асаблівая ўвага надаецца нашым ветэранам, іх сацыяльнаму і медыцынскаму абслугоўванню. Працягваецца работа па добраўпарадкаванні, а пры патрэбе – рэканструкцыі і рэстаўрацыі месцаў памяці. Гэта мемарыялы, пахаванні, брацкія магілы, мемарыяльныя пліты і дошкі. Усяго такіх аб'ектаў больш за 1,3 тысячы, за кожным замацаваны прадпрыемствы, арганізацыі, навучальныя ўстановы. Рэалізуецца праект па ўстаноўцы таблічак з QR-кодамі на ўсіх такіх месцах, па іх счытваецца гістарычная інфармацыя. 

Добраўпарадкоўваюцца і самі населеныя пункты, прыводзяцца ў парадак дваровыя тэрыторыі, вулічна-дарожная сетка. На сцены будынкаў наносяцца муралы. Паўсюдна праводзяцца дабрачынныя і патрыятычныя акцыі, да якіх актыўна прыцягваюць моладзь, у тым ліку малодшага школьнага ўзросту. 

Адсвяткаваць знамянальную дату, адзначыў Іван Крупко, Гомельшчына разлічвае з сябрамі – дэлегацыямі з Расіі і іншых краін. Дэталізацыя, прапрацоўка ўрачыстых мерапрыемстваў у Гомелі, райцэнтрах і ўсёй вобласці ідзе поўным ходам. 

Што тычыцца добраўпарадкавання і навядзення парадку ў месцах святкавання, на аб'ектах культурна-гістарычнага значэння, то тут, было падкрэслена, не можа быць ніякіх адгаворак і спасылак на недахоп часу або рэсурсаў. Неабходна падняць усе сілы і завяршыць работы да патрэбнага тэрміну, падагульніў губернатар. 

Падоўжыць жыццё любой цаной

На Гомельшчыне вырасла колькасць пажараў (на 20% з пачатку года) і загінулых у агні грамадзян. Сярэдні партрэт ахвяры вогненнай стыхіі тыповы. Гэта альбо глыбока пажылы чалавек, альбо асацыяльная асоба без пэўнага роду заняткаў. Што характэрна, 17 з 20 загінулых на пажарах сёлета знаходзіліся ў стане алкагольнага ап'янення. 

Для стабілізацыі абстаноўкі варта актывізаваць працу назіральных камісій, усіх суб'ектаў прафілактыкі. У шэрагу выпадкаў менавіта іх маўклівая бяздзейнасць прывяла да трагедый. 

Людзей з групы рызыкі ведаюць усе, асабліва ў невялікіх населеных пунктах, заўважыў кіраўнік вобласці. У першую чаргу іх павінны кантраляваць старшыні сельвыканкамаў. Накіроўваць да іх варта не педагогаў ці сацыяльных работнікаў, а ўчастковых, інспектараў МНС. Калі чалавек не паддаецца ўгаворам, то заканадаўствам прадугледжана прымусовае лячэнне ад алкагалізму. 

Важна надаваць увагу і тым, каго пакінулі дажываць век ў адзіноце нядбайныя дзеці. Тут павінны больш актыўна падключацца сацслужбы, медыкі. 

Паскараецца ў боксах і на дарогах

Кіпіць праца ў боксах мехдвароў, увесь АПК рэгіёна рыхтуецца да пасяўной кампаніі. Пачалася падрыхтоўка ў лістападзе мінулага года, і вось зараз падыходзіць да фінішу. Сярэднеабласны паказчык гатоўнасці тэхнікі – 91%, пры гэтым трактароў – 92%, плугоў і дыскатараў – 96% і 90% адпаведна. Але на месцах, як гэта бывае, тэмпы работ пакідаюць жадаць лепшага. Паводле слоў губернатара, мінусавыя тэмпературы не павінны быць апраўданнем для затрымак. У першую чаргу павінны падцягнуцца рамонтнікі ў Буда-Кашалёўскім, Гомельскім, Рэчыцкім, Рагачоўскім раёнах. Асабліва варта паскорыцца з рамонтам энерганасычаных трактароў і сеялак – асноўных удзельнікаў будучай кампаніі.

Увагу таксама звярнулі на праходжанне сельгастэхнікай планавых тэхаглядаў. У вобласці хапае гаспадарак, дзе ТА не пройдзены ніводнай адзінкай. Тэрмін устаноўлены дакладна: да 1 красавіка ўвесь парк АПК павінен атрымаць адпаведныя дакументы. Пакуль тэмпы праходжання нездавальняючыя.

Была ў цэлым закранутая тэма дарожнай бяспекі на Гомельшчыне. ДАІ актывізавала адпрацоўку дарог з прычыны павелічэння колькасці ДТЗ і загінулых у аварыях грамадзян. Істотна ўзмоцняць таксама кантроль за станам дарожнага пакрыцця на праблемных участках. Інжынерныя мерапрыемствы, якія павышаюць бяспеку руху, распрацоўваюцца і рэалізуюцца ўжо цяпер. З прыходам цяпла дарожнікі актывізуюць работы па ліквідацыі ямачнасці і нанясенні разметкі.