Старшыня аблвыканкама Іван Крупко акцэнтаваў увагу на неабходнасці забеспячэння праязджальнасці асноўных транспартных артэрый на Гомельшчыне, падтрыманні іх у адносна бяспечным, безаварыйным стане.

Быць гатовымі да любой непагадзі

Умовы надвор'я ў гэтым снежні складаныя, па-сапраўднаму зімовыя – з усімі праблемамі для дарог: завеі і заносы, галалёд, туман. На месцах, як было падкрэслена, сапраўды хапае нараканняў грамадзян наконт неналежнага ўтрымання вуліц, дарог, прыпыначных пунктаў. Недзе канкрэтна не хапае снегаўборачнай і іншай тэхнікі, недзе ёсць відавочныя прабелы ў арганізацыі работы камунальнай і дарожных службаў, канстатаваў губернатар. Такія заўвагі адрасаваны большасці раёнаў, а таксама абласному цэнтру. Нямала службовых асоб прыцягнута да дысцыплінарнай адказнасці.

Па дадзеных камунальнікаў, падчас праходжання цыклону ў вобласці працавала 300 адзінак тэхнікі прадпрыемстваў ЖКГ плюс яшчэ 89 адзінак іншых арганізацый. У адным Гомелі – амаль 100 машын. Але па факце, сказаў кіраўнік вобласці, гэтай колькасці людзей і тэхнікі не хапае. Як толькі надвор'е рэзка пагаршаецца, службы не спраўляюцца нават на галоўных дарогах, не гаворачы ўжо аб перыферыі. Безумоўна, тэхпарк трэба пашыраць. І новыя машыны закупляць, і больш актыўна займацца рамонтам дзеючых.

Сур'ёзныя цяжкасці з уборкай снега на паркоўках, дваровых тэрыторыях, чыгуначных платформах і пераходах. А яшчэ на тратуарах – на гэта асабліва шмат скарг.

Барацьба са снегам павінна мець сістэмны характар, упэўнены Іван Крупко. Пакуль адны адпачываюць, іншыя павінны працаваць, працаваць кругласутачна і без выходных – гэта відавочна і не абмяркоўваецца. Кіраўнікам важна адсочваць па датчыках GPS перамяшчэння тэхнікі, аптымізаваць мэты і маршруты. Калі патрэбны дадатковыя фінансавыя ўліванні – трэба абазначаць гэтыя моманты. Хаця, як вядома, камунальнікам і дарожнікам і так даплочваюць за аўральныя тэмпы.

На асноўных трасах накшталт М5, М10 сітуацыя цалкам памяркоўная: праязджальнасць дастатковая, ідуць уборка снежных валаў, аперацыі па водаадвядзенні. А вось у населеных пунктах, уключаючы буйныя гарады, уборка снегу буксуе – людзям дапамагае ўжо сама прырода, якая падарыла некалькі дзён адлігі.

Толькі сістэмнасць у гэтай рабоце дасць магчымасць паспяхова процідзейнічаць любой зімовай непагадзі, заключыў губернатар. А наступны моцны снегапад пакажа, якія высновы паспелі зрабіць кампетэнтныя службы.