Старшыня аблвыканкама Іван Крупко закрануў тэму выбараў Прэзідэнта Рэспублікі Беларусь, а таксама анансаваў вялікую нараду па правядзенні Года добраўпарадкавання.

Галасуем за чыстую Беларусь

Кіраўнік рэгіёна нагадаў, што 21 студзеня пачынаецца датэрміновае галасаванне. Гомельшчына гатова да правядзення выбараў Прэзідэнта Беларусі, вырашаны пытанні бяспекі, прапрацаваны арганізацыйныя моманты. У раёнах няма ніякіх пытанняў, усё зроблена для камфорту выбаршчыкаў.

Старшыня аблвыканкама анансаваў вялікую нараду па правядзенні на Гомельшчыне Года добраўпарадкавання. Яна пройдзе з усімі адказнымі службамі ў пачатку лютага:

– Раскрыем усе моманты, дэталі рэгіянальнай праграмы, выслухаем планы кожнага прадпрыемства.

Парадак у 2025 годзе неабходна навесці як у канкрэтных дамах, так і на вуліцах, дарогах па ўсёй вобласці, зазначыў губернатар. У рамках праграмы асобныя населеныя пункты будуць добраўпарадкаваны па пашыраным плане.

ЖКГ на першым месцы

У 2024 годзе ў аблвыканкам паступіў 4281 зварот грамадзян, што на 17 працэнтаў больш, чым у 2023 годзе. За пачатак 2025 года жыхары рэгіёна звярталіся 174 разы, прырост да аналагічнага перыяду мінулага года – 12,3%.

Тэматыка зваротаў захоўваецца з году ў год, пераважна людзей хвалююць пытанні ЖКГ, архітэктуры і будаўніцтва, землеўпарадкавання. Дастаткова часта паступаюць пытанні аб сферы працы і занятасці, сацыяльным і пенсіённым забеспячэнні, ахове здароўя. 

Нягледзячы на цёплую і камфортную зіму, тэхніка на Гомельшчыне гатова да ўскладнення ўмоў надвор'я. У парку 920 адзінак: пескасолеразмеркавальнікі, снегаўборачныя машыны, аўтамабілі для вывазу снегу, аўтагрэйдары, пагрузчыкі, ротарныя снегаачышчальнікі. На дадзены момант гатоўнасць тэхнікі – 97%. 

У выпадку паломкі рамонт праводзіцца ад дзвюх да трох дзён, дробны рамонт выконваецца ў той жа дзень. Напагатове дзяжурныя і аварыйна-выратавальныя службы, працуюць кругласутачныя гарачыя лініі ЖКГ.

Старшыня аблвыканкама падкрэсліў, што ўмовы надвор'я могуць пагоршыцца і вясной. У якасці прыкладу кіраўнік рэгіёна прывёў снежны цыклон Хаўер, які накрыў нашу краіну ў сакавіку 2013 года. Таму камунальныя і дарожныя службы павінны быць гатовы выехаць на ўборку снегу ў любы час.