На апаратнай нарадзе абмеркавалі пытанні добраўпарадкавання і падрыхтоўкі рэгіёна да зімы

Старшыня аблвыканкама Іван Крупко акцэнтаваў увагу і на падрыхтоўцы тэхнікі да ўборкі кукурузы.

Не расслабляцца

Штотыднёвую апаратнуюнараду старшыня аблвыканкама Іван Крупко пачаў з пытання правядзення ўборачнай кампаніі. Як адзначыў губернатар, аграрыі напружана працавалі ў выхадныя. Акрамя ўборкі, перад работнікамі аграпрамысловага комплексу рэгіёна стаяць тры асноўныя задачы: перакідваць тэхніку з улікам памераў і контураў палёў, аператыўна арганізоўваць вываз збожжа, прадумваць алгарытм своечасовай запраўкі машын, задзейнічаных у сельгасработах.

Што тычыцца ўраджаю кукурузы, 80% усходаў знаходзяцца ў добрым стане, каля 10% – у здавальняючым. Пры гэтым нельга страціць ніводнага зярнятка, падкрэсліў Іван Крупко:

– Прагназуем, што аб'ёмы кукурузы будуць дастаткова вялікімі. Таму ўжо цяпер важна разумець, якімі сіламі будзем яе прыбіраць. У кожным раёне неабходна яшчэ раз правесці рэвізію тэхнікі.

Акрамя таго, рэзюмаваў кіраўнік рэгіёна, пасля выпадзення вялікіх ападкаў ідзе зарастанне пасеваў, асабліва ў нізкай мясцовасці. Неабходна правесці апрацоўку гербіцыдамі.

За прыгажосць у адказе гараджане

Яшчэ адно з пытанняў апаратнай нарады – навядзенне парадку на тэрыторыі Чыгуначнага раёна Гомеля. Па дадзеных абласнога камітэта прыродных рэсурсаў і аховы навакольнага асяроддзя, замацаванне фізічных і юрыдычных асоб за землямі агульнага карыстання актуалізавана, аднак некаторыя напрамкі добраўпарадкавання неабходна актывізаваць.

У раёне праводзіцца рамонт і замена пліткі, турнікетаў, бардзюрнага камня, з пачатку года высаджана 5600 дрэў, 5000 кустоў і больш за 30 тысяч кветак. З'яўляюцца новыя клумбы, элементы ландшафтнага дызайну, спартыўныя і дзіцячыя пляцоўкі, малыя архітэктурныя формы, пастаянна праводзіцца кантроль парадку на двух пляжах раёна. У бліжэйшы час будзе заменена частка прыпынкаў грамадскага транспарту.

Рэкамендацыі эколагаў – прыцягваць як мага больш індывідуальных прадпрымальнікаў і прыватных асоб да навядзення парадку на зямлі, утрымліваць у належным стане кантэйнерныя пляцоўкі, не дапускаць зарастання пустазеллем. У якасці прыкладу прыведзена прадпрыемства «Гомсельмаш», калектыў якога сочыць амаль за 20 гектарамі зямель агульнага карыстання.

Памочнік Прэзідэнта – інспектар па Гомельскай вобласці Руслан Пархамовіч даручыў кіраўніцтву Чыгуначнага раёна вырашыць пытанне падключэння жыхароў шматкватэрных дамоў да добраўпарадкавання дваровых тэрыторый. Як адзначыў старшыня аблвыканкама Іван Крупко, дадзеная праца павінна быць праведзена па ўсёй вобласці. Задача галіны ЖКГ – выпрацаваць адзіную сістэму, якая будзе рэалізавана на тэрыторыі рэгіёна.

– Практыку акцыі «Чысты чацвер» можна перанесці на выхадныя дні і запрасіць жыхароў шматпавярховак да сумеснага навядзення парадку, – падагульніў кіраўнік рэгіёна.

Цёпла і дома, і на ферме

На Гомельшчыне працягваецца падрыхтоўка да асенне-зімовага перыяду. На дадзены момант праводзіцца рэгістрацыя пашпартоў гатоўнасці спажыўцоў цеплавой энергіі і цеплакрыніц.

Работы ажыццяўляюцца па ўстаноўленым графіку, уключаючы электронную форму. Абследаванне цеплакрыніц праведзена ў поўным аб'ёме, выдадзена больш за 80% заключэнняў. У ходзе праверак зафіксаваны шэраг тыпавых недапрацовак, якія неабходна ліквідаваць да пачатку восені: гэта нездавальняючы стан цеплаізаляцыі, адсутнасць афарбоўкі цеплаправода і іншыя.

Старшыня аблвыканкама паставіў задачу своечасовага рамонту катлоў:

– Усё ацяпляльнае абсталяванне павінна пачаць працу ў тэрмін. Акрамя таго, неабходна мінімізаваць і папярэдзіць магчымыя аварыйныя сітуацыі.

Губернатар таксама даручыў асаблівую ўвагу надаць падрыхтоўцы да зімы жывёлагадоўчых аб'ектаў.

ДАРУЧЭННЕ ГУБЕРНАТАРА

Забяспечыць кругласутачнае асвятленне аўтамабільных дарог, у тым ліку ў малых населеных пунктах, пры неабходнасці ўсталяваць святлодыёдныя свяцільні.