Старшыня аблвыканкама Іван Крупко таксама акцэнтаваў увагу на рамонце кормаўборачнай тэхнікі і падрыхтоўцы да купальнага сезона.

Наводзім марафет

У мінулыя выхадныя праз нашу вобласць праходзіў навальнічны фронт, хуткасць ветру дасягнула 20 метраў за секунду. На шэрагу аб'ектаў АПК пашкоджаны дах, выяўлены выпадкі падзення дрэў і нават гібелі сельскагаспадарчых жывёл у выніку траплення маланкі. У некаторых населеных пунктах энергетыкі ў аператыўным парадку аднаўляюць энергазабеспячэнне. 

Тэму добраўпарадкавання разабралі на прыкладзе Лельчыцкага і Жлобінскага раёнаў. Пры гэтым асаблівая ўвага – аграгарадкам.

У Лельчыцкім раёне акцэнт робяць на ператварэнні райцэнтра, які восенню стане сталіцай абласных дажынак, а таксама аграгарадка Буйнавічы. У спешным парадку абнаўляецца вулічна-дарожная сетка. Запланаваны маштабныя меліярацыйныя работы, а таксама вялікія аб'ёмы азелянення, зносу невыкарыстоўваемых будынкаў, устаноўкі малых архітэктурных формаў. Усе аб'екты і ўчасткі дарог, якія падлягаюць абнаўленню, замацаваны за калектывамі. Суботнікі будуць праводзіцца штомесяц, аж да кастрычніка.

Жлобінскаму раёну трэба будзе актывізаваць работу па забеспячэнні насельніцтва і арганізацый кантэйнерамі для збору адходаў, уладкаванні кантэйнерных пляцовак. Акрамя райцэнтра, абнаўляюцца гарпасёлак Стрэшын і аграгарадок Кірава. 

Калі ў цэлым меры па навядзенні парадку прызнаныя дзейснымі, то на тэрыторыях некаторых сельгаспрадпрыемстваў у абодвух раёнах фіксуецца нямала фактаў безгаспадарчасці. Населеныя пункты гэта адно, але і аб гаспадарках, заўважыў губернатар, нельга забываць. Як і аб парадку на могілках, а яшчэ – аб парадку на месцы знесеных старых пабудоў.

Важна да канца мая разабрацца з усімі зямельнымі ўчасткамі, якія можна ўключыць у севазварот. Зямля не павінна гуляць, сказаў старшыня аблвыканкама. Што датычыцца добраўпарадкавання населеных пунктаў, то гэтыя работы ў вобласці неабходна завяршыць да 1 верасня. Гэта датычыцца ўсіх раёнаў.

Надвор'е спрыяе

Аграрыі вобласці завяршылі сяўбу лёну ў аптымальныя тэрміны. Зараз актыўна ідзе сяўба кукурузы: надвор'е дазваляе прытрымлівацца графіка. На кармавыя мэты царыцу палёў павінны пасеяць да 25 мая. Пяць раёнаў ужо справіліся, паднаціснуць павінны ў Веткаўскім, Жлобінскім, Калінкавіцкім, Светлагорскім раёнах. 

Травы на раллі ў рэгіёне практычна пасеяны, у гаспадарках прыступаюць да работ па перазалужванню. Актыўна ідзе пасадка бульбы. 

Гатоўнасць кормаўборачнай тэхнікі ў рэгіёне складае 76% – гэта прыкладна 2,5 тысячы адзінак. Аднавіць засталося 590 машын і агрэгатаў, на гэта рамонтнікам адведзена паўтара тыдня. 

Набліжаецца пачатак купальнага сезона. На Гомельшчыне сёлета будуць працаваць 13 пастаянна дзеючых пастоў выратавання на водах плюс 35 сезонных. Усяго 68 пляжаў. Кадравы рэсурс складае больш за 200 чалавек, пры гэтым амаль палова ратавальнікаў ужо працаўладкавана. Плануецца прыцягваць да гэтай працы студатрады, а таксама навучэнцаў спецыялізаваных класаў. 

З улікам умоў надвор'я пляжы ў гэтым сезоне адкрыліся своечасова, практычна ўсе. Зараз поўным ходам ідзе ачыстка дна і прылеглай тэрыторыі. У планах ўстаноўка наглядальных вышак на кожным пляжы. 

Губернатар паставіў задачу паклапаціцца і аб дарогах – пад'язных шляхах да месцаў адпачынку.