У філіяле «Аграфірма імя Лебедзева» РУП «Гомельэнерга» кіраўнік азнаёміўся з працай МТК і падрыхтоўкай тэхнікі да веснавых палявых работ.

У трактарным парку Юрый Горлаў ацаніў гатоўнасць агрэгатаў, якія будуць удзельнічаць у ранняй пасяўной кампаніі.

– Пераканацца на свае вочы, спраўная гэтая тэхніка ці не, не ўяўляецца магчымым. Актаў гатоўнасці агрэгатаў, якія павінны быць падпісаны ўнутранай камісіяй гаспадаркі, не аказалася. Па плугах таксама ёсць некаторыя пытанні, – заўважыў памочнік Прэзідэнта.

Кіраўнік выказаў упэўненасць у тым, што да канца тэрміну (1 сакавіка) гаспадарка паспее падрыхтаваць усю неабходную дакументацыю.

У аграфірме шэсць энерганасычаных трактароў, пяць з якіх гатовыя да працы. Адзін рамантуецца ўласнымі сіламі ў майстэрні, дзе створаны камфортныя ўмовы для рабочых.

Падчас наведвання жывёлагадоўчага комплексу Юрый Горлаў вывучыў працэс падачы кармоў, умовы ўтрымання статка і маладняку, ацаніў аб'ёмы вытворчасці малака.

У гаспадарцы ёсць пэўныя памылкі па падзеле навацельных кароў на секцыі, ёсць і такая праблема, як скучанасць жывёлы. На думку кіраўніка, мае сэнс разгледзець пытанне будаўніцтва новага памяшкання.

– Мы бачым, што ёсць пэўныя пытанні. Па жывёлагадоўлі яшчэ трэба папрацаваць. У цэлым неабходна выконваць той тэхналагічны рэгламент, які прадпісаны для ўсіх. Лічу, такая гаспадарка, як «Аграфірма імя Лебедзева», павінна быць адной з паказальных гаспадарак Гомельскай вобласці, – рэзюмаваў Юрый Горлаў.