У Веткаўскім раёне праводзіцца мадэрнізацыя малочнатаварнай фермы «Тарасаўка»: тут будуюцца даільна-малочны блок, два кароўнікі, сянажныя траншэі, навес для цялят. 

Асноўны комплекс работ выконвае будаўніча-мантажны трэст № 27: прыступілі ў лістападзе мінулага года. Ужо пракладзены неабходныя інжынерныя сеткі, узведзены асноўныя будынкі і збудаванні, у бліжэйшы час пачнуць мантаж тэхналагічнага абсталявання. 

Матэрыяламі будаўнікі забяспечаны на 100%, працуюць без выхадных. Першы намеснік дырэктара будаўніча-мантажнага трэста № 27 Юрый Ашурка адзначыў, што нарматыўны тэрмін здачы аб'екта – красавік 2026 года, аднак у сувязі з даручэннем старшыні аблвыканкама Івана Крупко аб'ект павінен быць здадзены да канца гэтага года: 

– На гэты момант выканана 80% будаўніча-мантажных работ. На аб'екце працуюць каля 140 чалавек, прыцягнута пяць субпадрадных арганізацый. У хлявах выконваецца мантаж стойлавага абсталявання. Завозіцца тэхналагічнае абсталяванне ў даільна-малочны блок, у бліжэйшы час пачнецца мантаж даільных установак і абсталяванне кацельні.