Вылучыць матэрыяльную дапамогу і пуцёўку ў санаторый: старшыня аблвыканкама Іван Крупко правёў прыём грамадзян ў Гомелі

Гамяльчанка Ірына Мікалаеўна выхоўвае дзіця-інваліда з бранхіяльнай астмай. Маці пецярых дзяцей прыйшла на прыём з просьбай выдзялення пуцёўкі на мора. Для аздараўлення прапанавалі тры варыянты ў здраўніцах Беларусі, але яны яе не задавальняюць.

Зварот разглядаўся калегіяльна на спецыяльнай камісіі. Паколькі на Гомельшчыне на ўліку стаіць больш за 600 дзяцей з інваліднасцю, а ў трэцім квартале выдзелена сем пуцёвак у паўднёвым напрамку, іх размеркавалі сярод сем'яў у раёнах вобласці.

Губернатар даручыў сацыяльным службам і медыкам разгледзець магчымасць дапамагчы сям'і ў цэлым і прапрацаваць комплексную праграму лячэння дзіцяці.

Аказаць матэрыяльную дапамогу на набыццё лекаў просіць інвалід ІІ групы Ніна Паўлаўна з абласнога цэнтра. На працягу многіх гадоў ёй аказвалася дапамога ЦСАНам і аблвыканкамам. На гэты раз жанчына просіць поўнай кампенсацыі сумы, затрачанай на прэпараты. Камітэт па працы, занятасці і сацыяльнай абароне аблвыканкама разгледзеў зварот і прыняў рашэнне, што большая частка кошту лекаў у гэтым годзе кампенсавана, іншай сумы выдзелена не будзе.