Правялі нараду старшыня аблвыканкама Іван Крупко і міністр лясной гаспадаркі Аляксандр Кулік. Абмяркоўвалі ў першую чаргу скарачэнне выдаткаў, павелічэнне выручкі, работу з кадрамі, паведамляе тelegram-канал "Гомельшчына афіцыйна". 

Усё гэта, на думку спецыялістаў, дапаможа выйсці на бясстратную работу асобных лясгасаў рэгіёна. Установам гэтай галіны аказваецца фінансавая, у тым ліку бязвыплатная, і кансультатыўная сістэмная падтрымка як з боку Мінлясгаса, так і ад аблвыканкама.

Аляксандр Кулік адзначыў, што прадукцыя і цэны на яе ва ўсіх аднолькавыя:

– Аб'ём разліковай лесасекі на Гомельшчыне адзін з самых высокіх. Плюс вельмі добрыя кадры. Але вынік ёсць не ўсюды.

На нарадзе прыйшлі да адзінага меркавання: часткова праблему вырашыць штомесячнае павелічэнне паставак сыравіны – балансавай драўніны – на Добрушскую папяровую фабрыку і Светлагорскі ЦКК. Аднак патрэбны і іншыя ідэі.

У аблвыканкаме выпрацавалі дадатковы комплекс мер. 

– Перафарматаваць эканоміку, замацаваць за лясгасамі адказных работнікаў з ПЛГА, такая практыка ў вобласці дае свой плён. І не забудзьцеся вывучыць штатны расклад у частцы ІТР, – пералічыў перспектыўныя напрамкі работы губернатар.