Абмеркаваны шэраг праблемных тэм галіны. Закранулі і пытанні ўборачнай кампаніі.

Губернатар Іван Крупко задаў тэмп нарады і ўказаў на недахопы ў рабоце сельгаспрадпрыемстваў, выяўленыя ў ходзе маніторынгу.

На прыкладзе гаспадарак «Бывалькі» і «Зара» Лоеўскага раёна разгледжаны праблемныя пытанні ў раслінаводстве і жывёлагадоўлі. Кіраўнікам паказана на нізкія тэмпы кашэння траў. Ёсць прэтэнзіі да якасці кармоў, умоў утрымання жывёл.

Як падкрэсліў старшыня аблвыканкама, ні адзін факт безгаспадарчасці не застанецца па-за ўвагай, запытанне будзе жорсткім. Мірыцца з папушчальніцтвам у жывёлагадоўлі ніхто не будзе, трэба дзейнічаць, павышаць адказнасць кадраў за вынікі. І галоўнае – узмацняць дысцыпліну.

Губернатар паставіў задачу скласці падрабязны план работы па выпраўленні сітуацыі ў абедзвюх гаспадарках.

Абмеркавалі таксама функцыянаванне новых малочна-таварных комплексаў. На асобных МТК не дасягнуты паказчыкі па удоі малака ў суткі на карову. Галоўная прычына адставання – адсутнасць выразнага тэхналагічнага кіравання працэсамі на фермах.

Рэзервы ёсць, работу ў гэтым кірунку неабходна нарошчваць. Мінімум 20 літраў у суткі – такі паказчык павінен быць на ўсіх комплексах, гэта нават не абмяркоўваецца, падкрэсліў старшыня аблвыканкама. Калі задача не выконваецца – значыць, кіраўнік не на сваім месцы.

На нарадзе ішла размова і пра ўборачную кампанію. Прэзідэнт Беларусі засяродзіў увагу на ключавых задачах па аптымізацыі работ на палях. Пасылы пачулі – будзем выконваць.

Як адзначыў Іван Крупко, тэрміны жніва могуць перамяшчацца з-за надвор'я, але неабходна прыкласці ўсе намаганні, каб іх скараціць. «Менш дзён на ўборку – менш страт ураджаю», – падкрэсліў кіраўнік рэгіёна.

Важна таксама берагчы і падтрымліваць у належным стане тэхніку. Выключыць любыя прастоі. Кожны камбайн, сушылка, плюшчылка – усё павінна працаваць.

План па дзяржзаказе ўсе гаспадаркі абавязаны закрываць няўхільна, гэта святое.

Яшчэ адзін важны аспект – найстражэйшы кантроль расходу паліва, матэрыяльна-тэхнічных каштоўнасцяў.