Сяўба азімых, уборка кукурузы: актуальныя пытанні аграпрамысловага комплексу рэгіёна абмеркавалі ў аблвыканкаме

Нараду па пытаннях сельскай гаспадаркі правёў старшыня аблвыканкама Іван Крупко. Удзел у ёй прыняў памочнік Прэзідэнта – інспектар па Гомельскай вобласці Руслан Пархамовіч.

Больш за 18% ад плана сяўбы збожжавых культур выканана на Гомельшчыне. Гэта азімыя ячмень, пшаніца, трыцікале, жыта.

Ва ўсіх раёнах вобласці праводзіцца ўзворванне зямель, аднак штодзённы графік сяўбы выконваюць не ўсе. За гэты тыдзень неабходна нагнаць упушчаныя гектары, даручыў губернатар:

– Каб выканаць работу ў тэрмін, задзейнічайце ўсю наяўную тэхніку. Інакш кожны дзень заданне і па ўзворванні, і па сяўбе будзе расці з улікам нявыкананага плана.

Уборка саломы збожжавых культур – яшчэ адно з пытанняў нарады. На сённяшні дзень салома ў рулонах звезена на 130 тысячах гектараў. Галоўная задача сёння – вызваліць палі, якія прызначаны для сяўбы азімых.

Абмеркавалі таксама планы ўборкі кукурузы на зялёную масу. На дадзены момант працэс арганізаваны недастатковымі тэмпамі, адзначыў кіраўнік рэгіёна. Па гэтым накірунку таксама неабходна паскорыцца.

У асобных раёнах ужо прыбіраюць насенную кукурузу. Плануецца, што з наступнага тыдня паступова пачнецца ўборка царыцы палёў на зерне. Усё залежыць ад вільготнасці пачатка, службы ажыццяўляюць кантроль штодня.

На нарадзе таксама абмеркавалі пытанне падрыхтоўкі насення сельскагаспадарчых раслін пад ураджай 2026 года.