Нашы рэгіёны моцна звязаны агульнай славянскай гісторыяй і дынамічным развіццём.

Для Бранскай вобласці Беларусь застаецца важнейшым стратэгічным партнёрам. Рэгіён гандлюе амаль са 100 краінамі свету, на долю Беларусі прыпадае 64 працэнты, больш як 36 працэнтаў займае тавараабарот паміж Бранскай і Гомельскай абласцямі.

Па словах старшыні Гомельскага аблвыканкама Івана Крупко, аб'ём сумеснага тавараабароту дзвюх абласцей па выніках 2022 года павялічыўся на 118 мільёнаў долараў. Па выніках васьмі месяцаў бягучага года рост склаў каля 16 працэнтаў. Павялічваюцца пастаўкі гомельскай сельгастэхнікі, абсталявання, мінеральных угнаенняў.

– У нас ёсць немалыя рэзервы для пашырэння ўзаемавыгаднага супрацоўніцтва, – перакананы губернатар Бранскай вобласці Аляксандр Багамаз. – Адзін са знакавых сумесных праектаў – завод "Брансксельмаш" – філіял кампаніі "Гомсельмаш", дзе выпускаюцца корма- і збожжаўборачныя камбайны. За першае паўгоддзе вытворчасць тэхнікі на прадпрыемстве вырасла на 66,5%, а продажы павялічыліся на 87% да аналагічнага перыяду мінулага года. АТ "Брансксельмаш" увайшло ў рэестр буйнейшых прадпрыемстваў машынабудаўнічай галіны, стаўшы адным з вядучых пастаўшчыкоў сельгастэхнікі ў Расіі.

Стратэгічнае партнёрства пацвярджаецца высокай дынамікай міжрэгіянальных кантактаў. У гэтым годзе гомельскія будаўнікі рэалізавалі за межамі Беларусі першы поўнамаштабны будаўнічы інвестыцыйны праект менавіта на Браншчыне. Ім стаў шматкватэрны дом па вуліцы Строкіна, са 152 кватэр 38 прызначаны для дзяцей-сірот. Па ўмовах інвестпраекта, 15 кватэр перадаюцца інвестарам, Гомельскім домабудаўнічым камбінатам, гарадскім уладам бязвыплатна за прадастаўлены зямельны ўчастак, яшчэ 23 кватэры будуць набыты Бранскай гарадской адміністрацыяй па кошце квадратнага метра, устаноўленага загадам Мінбуда Расіі, – 35 729 рублёў.

Нашы рэгіёны дынамічна развіваюцца, рэалізуюць новыя праекты, вырабляюць прадукты, а прадпрыемствы знаходзяць новыя пункты для ўзаемавыгаднага супрацоўніцтва.