Памочнік Прэзідэнта – інспектар па Гомельскай вобласці Юрый Горлаў разам з журналістамі наведаў гандлёвыя аб'екты Добруша, Веткі і Гомеля

Асноўная задача рабочай паездкі – вывучыць наяўнасць харчовых тавараў на прылаўках. Даведацца, ці няма праблем з пастаўкамі прадукцыі ад прадпрыемстваў, якія за апошні час павялічылі аб'ёмы вытворчасці і экспарт у іншыя краіны, а таксама пачуць пажаданні пакупнікоў.

Добруш

"Родны кут" у вёсцы Ларышчава. Каля крамы сустрэлі Галіну Аляксееўну і Віктара Аляксеевіча. Пенсіянеры запэўнілі, што ўсё, што трэба, у продажы ёсць. Плюс для вяскоўцаў – не трэба ездзіць па прадукты ў горад. Крама знаходзіцца на трасе, па пакупкі прыходзіць шмат дачнікаў, дэфіцыту і праблем з пастаўшчыкамі няма, сказала прадавец Іна Кошкіна.

Аднак Юрый Горлаў звярнуў увагу на невялікі выбар хлебабулачных вырабаў, а гародніна ў продажы наогул адсутнічала. Як аказалася, для іх не створаны ўмовы. З мінусаў можна адзначыць тое, што патрабуюць рамонту прыступкі на ўваходзе ў краму і ў цэлым добраўпарадкаванне прылеглай тэрыторыі. З пажаданняў прадаўца – хацелася б заробак большы і яшчэ аднаго супрацоўніка, бо працаваць удваіх складана.

«Еўраопт».Вялікія гандлёвыя цэнтры складана назваць дэфіцытнымі, аднак Юрый Горлаў дасканала цікавіўся асартыментам. Дырэктар крамы Лара Кунай запэўніла, што ўсё ёсць, хлеба таксама дастаткова. Перабояў з пастаўкамі ад мясаперапрацоўчых і малочных заводаў няма. Узаемадзеянне, як і раней, стабільнае. "Думаю, мы можам задаволіць любога наведвальніка",– запэўніла кіраўнік.

«Суседзі». Мы пагутарылі з дзвюма жанчынамі каля крамы. Людміла Пятроўна і Надзея Іосіфаўна жывуць у цэнтры горада, часта тут здзяйсняюць пакупкі і ўсім задаволены: ладзяць цэны і асартымент. Іншая пакупніца ў гандлёвай зале пазначыла праблему, якая характэрная для многіх гандлёвых аб'ектаў, – высокія цэны на садавіну.

Ветка

«Еўраопт».На выхадзе з супермаркета сустрэлі дзяўчыну з каляскай прадуктаў. Вольга Папругіна расказала, што праблем няма ніякіх. А ёй ёсць з чым параўнаць. Яна год жыла ў Маскве, і нават калі ненадоўга прыязджала ў родную Ветку, купляла малочную прадукцыю, сыры, мяса, кансервы, цукеркі і нават макароны, каб забраць з сабой. Прычыны дзве: у расійскай сталіцы, зразумелая справа, усё каштуе даражэй, там адзін паход у краму супаставімы з тыднёвым «кошыкам» у нас. А што самае важнае – беларускія прадукты больш даспадобы і лепшыя па якасці.

– Вярнуўшыся праз год, мы нават росту цаны не заўважылі, – дадала дзяўчына.

Прыватны аб'ект "Гандлёвы цэнтр". Нас сустрэў Уладзімір Ганчароў – інвестар і дырэктар арганізацыі, у якую яшчэ ўваходзяць крама «Эдэльвейс», кафэ, пякарня, мясны цэх, дзе хутка пачнуць вырабляць пельмені. Выбар тавараў харчовых і бытавых вялікі. Адзначылі добры асартымент мясной прадукцыі. Перабояў з пастаўкамі ад прадпрыемстваў няма, але, калі ўзнікаюць пытанні, самі едуць забіраць прадукцыю. Асаблівасць цэнтра – хлеб уласнай вытворчасці. Пякуць яго па сваёй сакрэтнай тэхналогіі. Вырабы выдатнай якасці, без дадаткаў. Колькі ні прывозяць, прылаўкі тут жа становяцца пустымі. Па іх у райцэнтр прыязджаюць прадстаўнікі арганізацый з Гомеля, Добруша і нават Мінска.

Прыватная крама «Чэры маркет». Невялікі аб'ект, размешчаны ў добрым людным месцы, шмат пакупнікоў і як вынік –годныя абароты. Прадавец запэўніла, што пакупнікі ўсім задаволены. З плюсаў – добрая зарплата. Прыемна здзівіла, што ў прадаўца за спіной размяшчаліся паліцы з прысмакамі, а не з алкаголем, што мы заўважылі ў іншых месцах.

«Родны кут». У цэлым добры магазін, памяшканне прасторнае, усе неабходныя прадукты ёсць. Увагу прыцягнуў сектар з агароднінай і тое, як ён уладкаваны. Гародніна знаходзіліся ў кардонных скрынках дзіўнага выгляду, хоць больш прыдатны для іх варыянт як мінімум скрыні ці нешта больш прэзентабельнае. Бананы, моркву, цыбулю добрай якасці, два віды агуркоў, а вось яблыкаў не аказалася. Але прадавец запэўніла, што нядаўна прадала апошнія, і вось-вось на падыходзе новая партыя.

Гомель

Гіпермаркет» «Грын» на Мазурава. У ім ёсць усё. Хлеб ад розных вытворцаў, вялікая доля вырабаў ўласнай вытворчасці, якія выглядаюць максімальна апетытна. Тут, як аказалася, самы вялікі асартымент ялавічыны, прычым на выгляд вельмі свежай. У іншых крамах, у якіх мы пабывалі, яе было мала. Загадчык Аляксандр Дзеравянка сказаў, што прадукцыю пастаўляе Бярозаўскі мясакамбінат.

У гандлёвай зале пагутарылі з пакупніцай з Веткаўскага раёна Вікторыяй. Дзяўчына падыходзіла да касы з вялікім кошыкам.

– Прыязджаю сюды і заўсёды задаволена, – падзялілася суразмоўніца. – Уся прадукцыя добрай якасці – замарозка, рыба, мяса і фарш заўсёды свежыя, не абветраныя, як часта можна сустрэць у іншых крамах. Вось купіла шыйную выразку ялавічыны, яна пышная. Падабаюцца роллы, сушы– яны заўсёды выдатныя на густ і свежыя. Зразумела, што ў супермаркетах вялікая колькасць пакупнікоў, таму тут нічога не залежваецца. І невялікія крамы таксама патрэбныя. У цэлым лічу, што беларусы не застануцца галоднымі, выбар прадуктаў усюды добры, малочнай прадукцыі па пяць відаў. А галоўнае, цэны задаволяць любога пакупніка.