Вытворчасць дзіцячага і падлеткавага прафілактычнага абутку IDZI запусцілі ў мінулы панядзелак на базе Гомельскага філіяла Беларускага пратэзна-артапедычнага аднаўленчага цэнтра. 

Сёння цэх па пашыве абутку наведаў прэм'ер-міністр Беларусі Раман Галоўчанка. 

– Насіць гэты абутак можа любы чалавек. Гэты карысны абутак з элементамі артапедыі. Запусцілі падобную вытворчасць ў Гомелі для таго, каб не дапускаць сур'ёзных праблем у дзяцей і ім не спатрэбіўся спецыяльны абутак, – прэзентаваў гасцям мадэльны шэраг абутку генеральны дырэктар Беларускага пратэзна-артапедычнага аднаўленчага цэнтра Уладзімір Калевіч. 

У лінейцы дзіцячага і падлеткавага прафілактычнага абутку будуць летняя і зімовая калекцыі, усяго плануюць выпускаць каля 50 мадэляў. Яны падыдуць рабятам з двух да чатырнаццаці гадоў. 

Зараз на вытворчасці праводзяць пуска-наладачныя работы, створана 34 працоўныя месцы, людзей навучаюць. Пасля ў цэху будуць працаваць 56 чалавек. 

У наступным годзе тут плануюць выпусціць 42 тысячы пробных пар, пасля выхаду на поўную магутнасць з 2025-га пачнуць вырабляць 84 тысячы ў год, у змену гэта 350 пар абутку. 

Рэалізоўваць прадукцыю будуць праз інтэрнэт-краму, гандлёвыя сеткі, дзяржаўныя крамы. Прадпрыемства ўжо гатова ўдзельнічаць з новымі мадэлямі на выстаўках у Расіі, вядуцца перамовы з партнёрамі з Казахстана, Узбекістана і Кыргызстана.

Серыйная вытворчасць падобных відаў абутку наладжана толькі ў Гомелі.