Увагу акцэнтавалі на пытаннях земле- і водакарыстання, абыходжання з адходамі, збору другасных матэрыяльных рэсурсаў. Вёў паседжанне кіраўнік вобласці Іван Крупко.

З разраду галоўных каштоўнасцяў

Добраўпарадкаванне, навядзенне парадку на зямлі былі і застаюцца ключавым кірункам работы мясцовых органаў улады на Гомельшчыне і ва ўсёй Беларусі. Чысціня і парадак у гарадах, сельскай мясцовасці, прыродных эказонах застаюцца галоўнымі каштоўнасцямі, візітнай карткай нашай краіны, а таксама важным фактарам агульнага развіцця і поспехаў у эканоміцы.

У вобласці пры традыцыйна актыўным удзеле працоўных калектываў у мінулым годзе прайшлі вясновы і восеньскі месячнікі, рознага ўзроўню суботнікі, планавыя мерапрыемствы і акцыі па догляду тэрыторый. Нямала зроблена ў сферы азелянення, меліярацыі, аптымізацыі камунальнай сферы ў буйных гарадах, гарпасёлках, аграгарадках, вёсках. У Гомелі год таму аднавілі практыку штотыднёвых "чыстых чацвяргоў". Добра сябе зарэкамендаваў вопыт, яго можна і трэба пераймаць іншым раёнам.

Паветра ў вобласці вызначана стане чысцей. У мінулым годзе высадзілі звыш 88 тысяч дрэў (162% да выніку 2022-га) і 27 тысяч кустоў (252%).

Актыўна зносіліся старые будынкі і жыллё, уцягваліся ў абарот ўчасткі, якія вызваліліся. Выкананы вялікі аб'ём работ па замене агародж і асфальтаванню прылеглых тэрыторый на аб'ектах АПК. Лясгасамі праводзіліся санітарныя рубкі, ачысткі палос адводу аўтадарог.

Дзе зямля, там і вада. Нямала зроблена для падрыхтоўкі зон адпачынку на вадаёмах, пачынаючы з усталёўкі малых архітэктурных формаў і заканчваючы аўтапаркоўкамі. На пасяджэнні надалі ўвагу і пытанню якасці пітной вады ў сельскай мясцовасці. Адказным службам нагадалі, што да 2025 года праграмай "Чыстая вада" павінны быць ахоплены ўсе населеныя пункты Гомельшчыны.

За мінулы год у севазварот уведзена 14,5 тысячы гектараў безгаспадарных, зарослых драўняна-хмызняковай расліннасцю земляў. У гэтым трэба будзе ўцягнуць 13 тысяч гектараў. Губернатар паставіў задачу земслужбам – надаць асаблівую ўвагу лугавым землям, участкам у поймах рэк. А яшчэ землям, выдзеленым пад фермерскую гаспадарку. Калі апошнія доўга не выкарыстоўваюцца або выкарыстоўваюцца не па прызначэнні, без лішніх размоваў іх трэба адбіраць – такі механізм выразна прапісаны ў заканадаўстве.

Даведзеныя да вобласці планы і задачы ў сферы добраўпарадкавання ў 2023 годзе ў цэлым выкананы, рэзюмаваў Іван Крупко. Але работу ў гэтым кірунку неабходна весці пастаянна, ні ў якім разе не расслабляцца. А паказчыкі, як было сказана, шмат у чым зыходзяць ад саміх выканаўцаў – кіраўнікоў на месцах, эколагаў, землеўпарадчыкаў, камунальнікаў. Ад іх аддачы, аб'ёму назапашаных праблем, гатоўнасці выконваць і перавыконваць план. Парадак на зямлі ў адных раёнах, асобных гарадах у нас можна ставіць у прыклад, у іншых жа трэба тэрмінова мяняць падыходы і стаўленне адказных асоб да гэтых задач.

Дзе трэба папрацаваць

Адназначна дадаваць вобласці неабходна ў зборы другасных матэрыяльных рэ-сурсаў, рабоце па рамонце і тампанажу калодзежаў, свідравін, сферы абыходжання з адходамі. Па-ранейшаму ў розных раёнах выяўляюцца несанкцыянаваныя звалкі і нават факты закапвання адходаў работнікамі прадпрыемстваў, за што службовыя асобы прыцягваюцца да адказнасці, ажно да крымінальнай.

Ніяк не ўдаецца выкараніць у нас небяспечную расліну – баршчэўнік Сасноўскага. За мінулы год агульная плошча пад гэтым шкоднікам вырасла на 4%, гэта амаль 1,4 гектара. Выяўлена 61 раней няўлічанае месца вырастання, прычым, што характэрна, знаходзілі баршчэўнік эколагі, самі землекарыстальнікі – ніколі.

Яшчэ адной набалелай праблемай на месцах застаюцца недапрацоўкі ў добраўпарадкаванні могілак. Спасылацца на недахоп кіроўцаў, транспарту тут нельга, наяўнасць такіх цяжкасцяў, упэўнены кіраўнік вобласці, кажа аб адным – аб арганізацыйных праліках, некампетэнтнасці кіраўнікоў.

Што да звароту прадпрыемстваў, арганізацый з адыходамі, збору другсыравіны, то свая сартавальная станцыя, хай невялікая, павінна быць ва ўсіх без выключэння раёнах – такое дакладнае патрабаванне губернатара. Гэта не проста павысіць працэнт здабывання каштоўных рэсурсаў, але і забяспечыць працоўныя месцы, занятасць людзей.

Удзел у рабоце пасяджэння прынялі памочнік Прэзідэнта – інспектар па Гомельскай вобласці Юрый Горлаў, старшыня абласнога Савета дэпутатаў Кацярына Зянкевіч.