Кожны камбайн павінен быць у страі: у аблвыканкаме абмеркавалі гатоўнасць рэгіёна да ўборачнай кампаніі

Нараду па пытаннях сельскай гаспадаркі правёў старшыня аблвыканкама Іван Крупко. Удзел прыняў памочнік Прэзідэнта – інспектар па Гомельскай вобласці Руслан Пархамовіч.

Ключавая тэма – гатоўнасць рэгіёна да ўборачнай кампаніі.

– Усе наяўныя ў гаспадарках камбайны павінны быць у страі. На кожны камбайн неабходна прадугледзіць механізатара. У выпадку паломкі тэхнікі няма нічога важней за яе рамонт. Выкананне тэрмінаў уборкі – вось першарадная задача для старшынь райвыканкамаў у дадзены момант, – расставіў акцэнты губернатар.

Кіраўнік рэгіёна станоўча ацаніў усходы ў Мазырскім, Нараўлянскім, Чачэрскім, Рагачоўскім, Веткаўскім, Ельскім, Хойніцкім раёнах. Ёсць над чым працаваць Рэчыцы і Карме.

– Не забывайце пра падрыхтоўку сушыльных гаспадарак, плюшчылак. Іх графік павінен быць распісаны мінімум на тыдзень. І не пакідайце на апошні момант уборку саломы з палёў, – падкрэсліў Іван Крупко.

Яшчэ адно з пытанняў – нарыхтоўка травяных кармоў. На Гомельшчыне ўбрана 92% траў першага ўкосу. Недацягваюць да сярэднеабласнога паказчыка Светлагорскі і Акцябрскі раёны.

– Паскарайцеся. У максімальна сціснутыя тэрміны неабходна завяршыць уборку траў, трэба ўжо займацца другім укосам. Пытанне застаецца на штодзённым кантролі, – паставіў задачу Іван Крупко.

Старшыня аблвыканкама таксама звярнуў увагу на своечасовую падрыхтоўку плошчаў да сяўбы азімых, добраўпарадкаванне зямель уздоўж рэспубліканскіх трас. Асобна абмеркавалі пытанні захаванасці жывёлы і рэалізацыі малака, абнасеньвання жывёл.