Выязная нарада па пытаннях гатоўнасці жывёлагадоўчых аб'ектаў сельскагаспадарчых арганізацый да зімова-стойлавага перыяду праходзіла на базе Чачэрскага раёна.

Пасяджэнне праводзіў старшыня аблвыканкама Іван Крупко. У нарадзе прымаў удзел памочнік Прэзідэнта – інспектар па Гомельскай вобласці Юрый Горлаў.

Камітэтам па сельскай гаспадарцы і харчаванні аблвыканкама распрацаваны графік падрыхтоўкі аб'ектаў. Ён прадугледжвае завяршэнне работ 1 лістапада. На гэты момант поўнасцю гатовы да зімы 422 аб'екты, дакладна па графіку ідуць гаспадаркі Мазырскага, Брагінскага і Светлагорскага раёнаў.

На асаблівым кантролі застаецца падрыхтоўка ферм Добрушскага, Рэчыцкага і Жлобінскага раёнаў.

– Падрыхтоўка гаспадарак да зімы ў тэрмін – зона вашай асабістай адказнасці, – папярэджанне ад губернатара старшыням райвыканкамаў. – Правесці ачыстку адрын, адрамантаваць агароджы і ўваходныя групы, добраўпарадкаваць тэрыторыю.

Пасяджэнне завяршылася абмеркаваннем планаў на найбліжэйшыя дзесяць дзён.

– Дзяржава падстаўляе плячо аграпрамысловаму комплексу. Кіраўнікі раёнаў павінны наладзіць работу так, каб сельгаспрадпрыемствы былі гатовы да зімы своечасова, прытрымлівайцеся складзеных графікаў, – падагуліў памочнік Прэзідэнта – інспектар па Гомельскай вобласці Юрый Горлаў.

Кіраўнік падкрэсліў, што калі кожны будзе добрасумленна выконваць свае абавязкі на месцах, вынікі работы і паказчыкі будуць значна вышэйшыя.

Другая частка нарады – практычная, на фермах Чачэрскага раёна.

МТФ «Роўкавічы» КСУП «РоўкавічыАгра» – першы пункт маршрута. У цэлым ферма гатова да зімова-стойлавага перыяду. У той жа час старшыня аблвыканкама і памочнік Прэзідэнта зрабілі некаторыя заўвагі.

Напрыклад, дырэктару гаспадаркі даручылі прапрацаваць пытанне абсталявання вентыляцыі ў кароўніках, раўнамернай раздачы кармоў, устанавіць карткі з паказчыкамі статка. Акрамя таго, неабходна сачыць за якасцю кармоў.

– За тэхналогію адказвае гаспадарка, за парадак – райвыканкам, – рэзюмаваў кіраўнік рэгіёна.

МТФ «Покаць» ААТ «Звязда» – яшчэ адзін аб'ект, які наведалі ўдзельнікі выязной нарады.

На ферме абмеркавалі тэхналогію вытворчасці прадукцыі жывёлагадоўлі, магчымыя варыянты арганізацыі сістэмы даення і вадапою.

Сур'ёзных заўваг кіраўнікі не зрабілі, ёсць на ферме толькі нязначныя недапрацоўкі, якія будуць ліквідаваны ў бліжэйшы час.