Пад кіраўніцтвам старшыні Савета Рэспублікі Наталлі Качанавай у Жлобінскім раёне прайшло пасяджэнне Савета па ўзаемадзеянні органаў мясцовага кіравання і самакіравання пры Савеце Рэспублікі Нацыянальнага сходу Рэспублікі Беларусь.

Удзельнікі абмеркавалі праблемныя пытанні дзейнасці садаводчых таварыстваў і шляхі іх вырашэння, а таксама навядзенне парадку на зямлі ў рамках Года добраўпарадкавання. 

У пасяджэнні прынялі ўдзел старшыня аблвыканкама Іван Крупко, памочнік Прэзідэнта – інспектар па Гомельскай вобласці Руслан Пархамовіч, член Савета Рэспублікі, старшыня абласнога Савета дэпутатаў Кацярына Зянкевіч. 

У ліку запрошаных – члены Савета Рэспублікі, прадстаўнікі міністэрстваў, Дзяржаўнага камітэта па маёмасці і мясцовых органаў улады.

Пытанні, што разглядаліся, заснаваны на прапановах, з якімі да сенатараў і мясцовых органаў улады прыходзяць жыхары краіны. На гэтым зрабіла акцэнт старшыня Савета Рэспублікі Наталля Качанава:

– Звароты грамадзян дазваляюць вызначыць, ці дастаткова заканадаўчай базы, якая ёсць цяпер, або неабходна ўрэгуляваць гэтае пытанне дадаткова.

У прыватнасці, членаў садаводчых таварыстваў хвалююць праблемы выбрання кіруючага складу, неэфектыўнай працы старшыняў, прапіскі на дачы, камунікацыі ўнутры аб'яднанняў. Аднак ёсць цяжкасці з добраўпарадкаваннем пустуючых участкаў, функцыянаваннем інжынерных сетак.

Удзельнікі пасяджэння абмеркавалі канкрэтныя прапановы па ўрэгуляванні гэтых пытанняў.

На тэрыторыі Гомельскай вобласці зарэгістравана 805 садаводчых таварыстваў у чатырнаццаці раёнах. Прывёў статыстыку старшыня аблвыканкама Іван Крупко.

Інвентарызацыя зямельных участкаў, легалізацыя самавольна занятых зямель, удасканаленне парадку прызначэння старшыняў, іх навучанне і атэстацыя – губернатар унёс канкрэтныя прапановы для паляпшэння функцыянавання такіх таварыстваў.

Іван Крупко таксама прапанаваў стварыць электронны адзіны рэестр членаў садаводчых таварыстваў.

Па словах кіраўніка рэгіёна, мясцовыя выканкамы садзейнічаюць у вырашэнні пытанняў, з якімі звяртаюцца грамадзяне.

Другое пытанне пасяджэння Савета – сумесная работа дзяржаўных органаў па ўключэнні ў гаспадарчы абарот зямельных участкаў, навядзенні парадку на зямлі, меліярацыі і эфектыўным выкарыстанні зямель.

– Чысціня і парадак – брэнд нашай краіны, і кожны метр зямлі павінен выкарыстоўвацца эфектыўна, таму што гэта наша багацце, – падкрэсліла Наталля Качанава.

Асабліва гэта актуальна ў Год добраўпарадкавання, адзначыла спікер, а галоўныя прынцыпы ў рабоце вызначаны Прэзідэнтам Аляксандрам Лукашэнкам:

– Зямля не павінна пуставаць. У гэтай працы важны вынік. Неабходна зрабіць усё, што залежыць ад нас, каб запланаваныя мерапрыемствы былі выкананы.

Навядзенне парадку на зямлі знаходзіцца на пастаянным кантролі кіраўніцтва Гомельскай вобласці. Пра гэта расказаў у сваім выступленні старшыня аблвыканкама Іван Крупко. Ужо 12 гадоў у паўднёва-ўсходнім рэгіёне эфектыўна праводзіцца комплекснае добраўпарадкаванне населеных пунктаў. На год у кожным раёне вызначаецца два райцэнтры і па адным аграгарадку, якія цалкам абнаўляюцца:

– Актыўны ўдзел саміх мясцовых жыхароў у добраўпарадкаванні – трэнд апошняга часу. Людзі выразна разумеюць, што яны гэта робяць для сябе і сваіх дзяцей.

Акрамя таго, папулярнай стала практыка правядзення суботнікаў і чыстых чацвяргоў.

– Парадак у гарадах вобласці – наш стыль жыцця, – падкрэсліў кіраўнік рэгіёна.

Акрамя таго, губернатар прывёў прыклады ўключэння невыкарыстоўваемых зямель у сельскагаспадарчы абарот. Руплівы падыход у гэтым напрамку дазваляе атрымліваць большы ўраджай збожжа.