"Беларуснафта" першай у СНД прымяніла на радовішчах перадавую тэхналогію Zipper Frac
"Беларуснафта" першай у СНД прымяніла перадавую тэхналогію ZipperFrac, паведамілі БелТА на прадпрыемстве.
Гэтую методыку спецыялісты кампаніі прымянілі на Рэчыцкім радовішчы пры шматстадыйным гідраўлічным разрыве пласта (ГРП). Яе сутнасць – дасягнуць растрэсквання пароды, насычанай вуглевадародам, пры запампоўванні ў свідравіну вадкасці.
"Назва тэхналогіі (з англ. Zipper– маланка) звязана з канфігурацыяй свідравін і парадкам правядзення стадый ГРП, якія нагадваюць маланку. Аперацыі адбываюцца адначасова або паслядоўна ў двух гарызантальных ствалах свідравін, якія размешчаныя паралельна адзін аднаму. У спалучэнні з методыкай Plug&Perf колькасць і плошча расколін павялічваюцца, а з імі і эфектыўнасць асваення запасаў", – расказалі на прадпрыемстве.
Эфект прымянення гэтай тэхналогіі відавочны: літаральна тыднем раней з прымяненнем ZipperFrac кампанія ўстанавіла абсалютны рэкорд па колькасці выкананых гідраразрываў за суткі – шэсць стадый. Усяго за два тыдні ў кругласутачным рэжыме на свідравінах № 420 і 443 Рэчыцкага радовішча праведзена 52 аперацыі. У пласт было запампавана амаль 5 тысяч т матэрыялу, які раскліньвае, і звыш 40 тысяч куб. м вадкасці. На адным з этапаў прысутнічаў член Савета Рэспублікі, генеральны дырэктар "Беларуснафты" Аляксандр Ляхаў.
Па словах гендырэктара, кампанія працуе на найстарэйшым з беларускіх нафтавых радовішчаў – Рэчыцкім – ужо больш за 50 гадоў. Яно знаходзіцца на апошніх стадыях распрацоўкі, пры гэтым тут удаецца дасягаць уражлівых вынікаў. "Дзякуючы выкарыстанню сучасных методык, такіх, напрыклад, як ZipperFrac, не толькі не змяншаем, але і нарошчваем тэмпы здабычы нафты, асвойваем запасы вуглевадародаў, якия цяжка здабыць. З года ў год паспяхова ўкараняем самыя інавацыйныя тэхналогіі. Гэта сведчыць аб кампетэнтнасці і прафесіяналізме калектыву беларускіх нафтавікоў, пацвярджае высокі статус "Беларуснафты" як міжнароднай энергетычнай кампаніі", – падкрэсліў Аляксандр Ляхаў.
Вытворчае аб'яднанне "Беларуснафта" створана ў 1966 годзе. Прадпрыемства вядзе пошук, разведку і распрацоўку нафтавых радовішчаў, бурэнне свідравін, здабычу нафты і спадарожнага нафтавага газу ў Беларусі, працуе ў нафтавай сферы іншых краін.
